文章分類: 談職場心得 (大口仔筆記)

闖

tabodiary — Mon, 12 Oct 2009 23:35:08 +0800

到國內出差數天，目的地是中國的首府，去年替中國完夢的北京。

沒有上海人那不可一世的態度，北京人給我的感覺是老實純樸，但又不失財大氣粗的中國特色。

宏偉的機場、比地標更地標的鳥巢及水立方，還有那比香港國際機場大三倍以上的首都機場，都使大口仔口中念念有詞地嚷著"祖國真偉大"、"中國人民終於都站起來了"等充滿中國特色的口號。

不過我想問，北京人(或中國人)，真的容得下王府井及大冊欄上林林總總的LV店、GUCCI店嗎？

現職崗位有機會讓大口仔隨意去闖，我就盡情去闖。中國很大，我等香港仔不宜自卑又自大地屈在井下，每天自怨自艾地嘆著甚麼懷才不遇，上天對我不公平等無料透頂的口頭禪。

做人要有夢啊！高昆發表有關光纖理論時才30出頭，做中大系主任時人家還以為他是學生。誰說香港不能有下一個高昆、下一個李嘉誠呢？共勉之！

公平？

tabodiary — Sat, 20 Jun 2009 12:49:42 +0800

好耐都無寫過有關"談職場心得"的文章，一來轉職後工作迫人，每日都忙於適應新工作及找新生意來源，無暇反省自已在職場上的得失，二來發覺坊間不少高人都有持續分享職場技巧，文章的可讀性比大口仔高出太多，所以獻醜不如藏拙。

兩個月過去，6月份的考試亦完了，週末的時間終於可以靜下來整理一下自已的思緒，當中當然亦包括工作上的體驗。

轉職後，可能要管理的人及競爭對手多了，這兩個月聽到最多的詞語係"公平"呢兩個字....

同事會問：老闆，點解佢可以咁我又唔可以？好似唔係好公平！

對手會問：兄弟，點解有D人會咁做爭生意，好似唔合法喎，唔公平！

每一次面對差不多的問題，大口仔都會以三寸不爛之舌，出盡口水令同事及對手"相信"呢個世界係公平既、個遊戲係公平既，你放心繼續做啦！

但其實我心諗，呢個世界邊有公平架？邊個諗到，唔違規，到時就做得快好世界架喇！有好多野亦唔係咁容易可以追究到，你地下下將時間同我研究公唔公平，不如放多D時間做好你份工好過啦！依家出面打緊仗呀兄弟！

你有冇面對(問過)相同既問題呢？你有乜睇法呢？有時間寫少少感想，等大口仔有多D靈感同大家分享多D呢方面既感受....

生活

tabodiary — Sat, 25 Apr 2009 22:36:31 +0800

忙碌的生活持續....

新崗位的挑戰在於大口仔過往較少接觸這類工作，一上位即時要面對幾位老手的夾擊，同時要接替一位口碑麻麻的前管理人，接手的整個團隊基本上無甚系統，同事們都有心工作但大都處於單打獨鬥的困境。

大口仔要做的是聆聽、回顧、重組及強化，我要用最少的時間去整頓團隊，令所有隊員信任我，甘心為我工作，一起去追回前三個月的時間(還有業績)，我信咱們可以，Yes We Can！

投資方面，仍然無乜值得講，形勢基本上無大變化，但時間開始站在投資者的一邊，大口仔會繼續"積累"資產，懶理市場的起起跌跌。

仲有想同大口老婆講(寫)句"我愛妳"(親口講及在筆記內寫)，多謝妳在背後一直支持我，無左妳我同大口BB真係唔知點攪....

新一頁

tabodiary — Sat, 04 Apr 2009 15:43:00 +0800

有網友問大口仔工作上的"新一頁"係咪升職，我只能夠話工作上的責任比從前大了很多，管理的人數多了三倍，但人工就一蚊都無得加，仲要去到一個百廢待舉的地方從新建立新秩序，結果可以非常吃力不討好，但我仍願意一試。

當我的新動向在公司公布後，有唔少老友話大口仔傻得可以，唔明白點解我要接受一個吃力不討好，金錢上又未必有即時得益的任命。聽到幾位老友的"意見"，大口仔一笑置之，因為我好清楚自己的事業路線圖該如何走。現階段對我來說，金錢並非一切，Exposure才是重點。公司俾機會我接掌一個我從未做過的部門，從中獲取新的工作經驗，我唔覺得有需要考慮。

有得必有失，新崗位的工作令大口仔這幾星期忙得喘不過氣，不停的與同事面談、無間斷的見客、檢討第一季業績及制定新的工作計劃等工作幾乎已消耗了大口仔所有時間，之後的情況可能會更壞，希望大口BB第日唔好唔認得我。

之前同大家提過可以留意下本地銀行股，在一眾大行"一致"不看好的情況下"逆市投資"。唔知大家最後有無參與呢？趕唔切在大升市前同大家詳細分析(享)原因，覺得有點可惜，之後有時間會再講。

各位的留言大口仔一定會睇，但未必一定有時間覆，請見諒！

Laughing哥的啟示！

tabodiary — Mon, 23 Mar 2009 19:59:14 +0800

近期同事之間的話題如果唔係"港男港女"，就一定係"Laughing哥"！

"Laughing哥"係咪死、幾時死同點樣死，講真，大口仔唔太關心，一來因為"Laughing哥"係因為劇情需要而"去"，我地第三者不宜多言，反而應該祝福佢捨生取義。二來"學警出更"始終係戲一套，生離死別都在做戲，不需過於認真。

但有趣的是，"Laughing哥"起死回生事件完全體現到GenY利用網上力量達成目標的威力！

當"Laughing哥"死去當晚，網上立即風起雲湧，大大小小的討論區都出現要求無線"Laughing哥"復活的訴求，有人更加在Facebook為"Laughing哥"建立群組，設計應用程式。

短短一個星期，總共有超過1,600,000人次用各式各樣方式拯救"Laughing哥"，結果如無意外，無線會順應市民要求，將"Laughing哥"起死回生。

大口仔相信有心有力有時間去推動拯救"Laughing哥"的人，大部分屬於GenY一族，佢地對潮流熱點反應超快，會努力地完成自己有興趣的目標。

事實證明GenY的反應、組織力及辦事能力都絕對不弱，問題係佢地有冇興趣去做，同埋有冇人適當地引道佢地去做....

Generation Y (4) - GenX有野講！

tabodiary — Sun, 15 Feb 2009 14:14:39 +0800

相對GenY的委屈，GenX則多數對GenY抱有負面態度....

1. GenX覺得GenY大多懶散，無方向無上進心。
2. GenX覺得GenY唔明白待人接物比學歷重要。
3. GenX覺得GenY主動性不強，往往要上司講到出口先會努力。
4. GenX覺得部份家境不好的GenY值得社會幫助。
5. GenX覺得GenY多抱有"老馮"心態，成日覺得社會同公司欠左佢....
6. GenX認為GenY與其花時間緬懷過去，不如努力現在。
7. GenX相信GenY都有好多種，好難一概而論，GenX都有不少"非常GenY"的....
8. GenX對GenY覺得香港Game Over好心痛，因為GenX的際遇非GenY口中的好，不少GenX都是捱出來的。

你同意GenX的看法嘛？

大口仔生於兩代人的隙縫間，上年又開始接手管理一大班GenY下屬，對GenY呢個題目自然滋味在心頭。寫呢個題目前，我努力回憶起自己的成長歷程，想像自己的背景同上一代(指60-70年代出生的前輩)有何分別，那些分別點樣影響我往後的行為等等。

寫之前以為自己想得好全面，點知....

睇完大家的留言，對GenY呢個題目又有更多新體會，你們所講的我不是全部同意，亦有自己的見解，之後我會用第一身及第三者的身份去同大家分享，亦會抽少少時間回應幾位GenY的留言。

浸會大學僱主午餐會

tabodiary — Thu, 12 Feb 2009 11:10:31 +0800

昨天受邀參加浸會大學僱主午餐會，午餐會在洲聯酒店舉行。

席間聽到台上蘇澤光先生分享如何面對逆境，如何在危機中克服"危險"及把握"機會，聽後深表認同。回顧香港過去面對過的危機，每一次危機最終都成為香港轉型的契機，"空洞化"一詞不是新鮮事物，早於80年代香港工業北移，當時的香港人亦擔心過失去了工業的香港應如何自處，最後，香港轉型成中國的營業部，工廠設於廣州，再一次成功轉型。

今天香港再一次面對危機，但咱們的底子並不差，政府亦有龐大的儲備去把握未來的機會。香港人，無論是GenABCD....XYZ都好，請各展所長，放遠眼光，齊心合力把握後金融海嘯所帶來的龐大機會。

另外，值得一提浸會大學在午餐會中安排了學校的學生大使與嘉賓同桌，招呼賓客之餘亦不忘推銷自己，午宴後更主動以電郵寄上自己的履歷給嘉賓作參考，雖然這做法未必可即時為同學帶來一份好工，但那份經驗對學生來說卻非常寶貴，值得一讚。

Generation Y (3) - GenY有野講！

tabodiary — Sun, 08 Feb 2009 16:16:17 +0800

首先，多謝各方好友踴躍發表意見，同大口仔預期一樣，GenY與非GenY之間擦出唔少火花。

我相信呢個題目長嗌長有，亦的確如一位讀者所言，上一輩永遠都係覺得一蟹不如一蟹，但咁樣唔代表大家唔需要去正視呢個問題。大口仔講呢個題目既目的，係要兩代人明白大家諗緊乜，點解會咁諗及呢樣野會點樣影響大家的職場發展。

寫呢篇之前一口氣睇返約30個份量相當的留言，當中以GenY的留言較多，大概係平常生活都領較過"前輩"的訓示，所以有感而發吧？究竟GenY有乜想講呢？

1. GenY都不是個個生於中產，所以有"草根GenY"的出現。
2. GenY對香港的黃金年代有概念，覺得當時機會處處，與現在的香港是天壤之別。
3. GenY大都認為香港已玩完、無優勢、迷失、無發揮空間、大陸人卻好平、好叻。
4. 基於3，GenY覺得就算讀到大學都無用，更枉論中五、中七畢業的景況了。
5. GenY對前路迷茫，因為社會上的工作都集中在金融及會計。
6. GenY覺得今日的香港，就算係24歲GenY版的林森池(哈！)都無發圍空間。
7. GenY的物質主義係上一代(GenX傳媒人？)做成的，被耳濡目染所至。
8. GenY出道後的路好難行，97金融風暴、IT Bubble、SARS、08金融海嘯，路難行但仍有一部分人好努力向上爬。
9. 有部分GenY覺得唔應該咁負面，乜都話社會錯，香港無機會可以北上發展。
10. GenY覺得GenX未經歷過SARS搵工的慘況，無資格批評GenY。

有漏請提出，下篇會講GenX or above點睇GenY！

當然，請繼續發表意見....

Generation Y (外傳)

tabodiary — Mon, 02 Feb 2009 20:38:21 +0800

一個題目能夠引起各位莫大反響自有其原因....

一日內多達20個留言代表了兩代人之間的落差。你覺得有怨無路訴嗎？他卻認為你活該，但其實，咱們都不自覺地夾在世代的隙縫間。

有怨氣的，請你在看到同世代人的控訴及上世代人的批評後，勇敢的繼續發表意見。想發炮的，請張開耳朵聽聽下世代人口中的委屈，然後不吝賜教。

早早說過，寫GenY不是要批判任何人，只是想以第三者的身份，理性地討論這個社會現象對職場的影響。大口仔有信心有能力更有資格做這場討論的中間人！因為，我生於GenX與GenY兩個世代的中間....

Generation Y (2)

tabodiary — Sun, 01 Feb 2009 11:46:55 +0800

GenY的特質人言人殊，不過大口仔相信有幾點客觀因素造就GenY的誕生。

1. 香港的GenY大部分都在中產家庭長大，成長時的物質水平一般不俗。
2. 在家中，GenY由細到大都是被遷就的一個，因為佢可能係獨仔，或者家裡有工人服侍。
3. GenY不用(不打算)打工供養父母，因為大部分GenY的父母都有一定財富水平，打工不是必需品。
4. GenY對長輩概念薄弱，因為過時過節收完利是總有父母提水那位阿叔(嬸)係乜水，對堂表叔舅姨無乜概念。
5. 由於成長環境影響，GenY習慣以電子渠道溝通(Email、SMS、MSN etc)，對打電話有一定抗拒，如非必要，最好send SMS算數。
6. GenY於成長中沒有遇過甚麼大挫折，升唔到香港大學最多咪去澳洲讀囉，最大的挫折反而可能係中學時期同女(男)朋友分手....

上述僅代表大口仔觀察到大部分GenY的"成長背景"，社會上當然有一部分GenY的家境不好，自少捱苦卻甚懂人情細故，但我相信由80年代開始，要"真正"捱苦的香港細路仔只佔少數。

生於80年代的閣下是否上述六點的其中一人？

閣下知道自己的"成長背景"對你在職場發展有舉足輕重的影響嗎？

上述的"成長背景"又會如何影響GenY於職場中的表現呢？

Generation Y (GenY)

tabodiary — Sat, 24 Jan 2009 16:21:44 +0800

有冇聽過Generation Y (GenY)？

GenY代表著1980年後出生的社會新生代，去年，大口仔於公司內部培訓中第一次接觸GenY這個名詞。點解公司要特別安排大口仔這類管理人員接受有關GenY的培訓？答案顯而易見，因為有需要！

以大口仔管理的團隊為例，10個人當中有7個都屬於GenY，他們都有唔少共通點，而這些共通點又有不少會為管理者帶來挑戰，若管理不善，更會嚴重影響公司日常運作。怎樣同GenY相處、管理GenY亦漸漸成為管理學的重要課題....

請問閣下是否GenY？

若是，您又認為自己有哪些特質與上一代的Generation X (1970至1980出生的人)不同呢？

若否，您對GenY有何感覺？覺得他們有何特性？同自己有何不同呢？

履歷表

tabodiary — Sat, 17 Jan 2009 12:31:54 +0800

發覺自己已經有一段時間無定時整理自己的履歷表....

仲記得初出茅廬的時候，每逢考獲任何新的專業資格、在公司內獲得任何獎項、學歷上有任何躍進，大口仔都會雀躍地更新自己的履歷表，總覺得這樣才算完成某部分的"自我改造工程"。

直到加盟現職公司後，這個"指定動作"就慢慢減少，主要原因係公司俾到機會自己發揮，仕途尚算順利，兩年間竟然無任何轉職之意，我自己都覺得有點兒出乎意料之外。

但我提醒自己，世界上無野係無可能發生的，一份隨時可以寄出的"Updated Resume"絕對係在職場上行走的"最基本要求"，亦係對自己職場生涯的一份尊重。

我竟然連這樣重要的工作都可以怠慢，真係抵打！大家千其唔好學我....

勿做"Yes Man" (2)

tabodiary — Mon, 05 Jan 2009 20:37:40 +0800

大口仔面對不是自己工作範疇內的要求，我會於腦中先斷定那件事的嚴重性去到甚麼程度，再看提出要求的同事或老闆對自己的重要性如何。

老闆的要求當然要盡量做到，但做之前我會禮貌地提醒老闆那件事不是我的工作範疇，幫忙係因為看在老闆份上。若幫了一次後，老闆短期內又要求自己做多一次"份外事"，大口仔好有可能會選擇性地用"適合的藉口Say No"，讓老闆知道自己不是"Yes Man"！對不合理的事都會維護自己主權完整。

至於同事，要看自己想不想與那同事加強關係或有沒有其他利害關係，若值得幫的話，會套用應對老闆那套對待，即選擇性地幫，但絕不做"Yes Man"！

記住，一個每日做14個鐘的員工(正常工時9個鐘)，間中一日返12個鐘老闆可能會覺得佢懶左，但一個平日返9個鐘的同事，若有一兩日返12個鐘幫公司趕掂個PROJECT，老闆可能會覺得佢好偉大，差D要俾個最佳員工獎佢tim！

"Say No"係一種藝術，"Say No"唔代表卸膊，"Say No"係讓自己在適當的時候做正確的事，做得好可以令你在職場上更長袖善舞，家庭生活更加美滿。

相反，做"Yes Man"的下場可能同"新界牛"一樣，死路一條被人劏。

勿做

tabodiary — Sun, 04 Jan 2009 16:56:14 +0800

有網友同大口仔講，工作上佢地唔識"Say No"，好多時俾同事同老闆"物盡其用"得好緊要，問大口仔有冇方法可以改變情況....

大口仔唔反對想"上位"的朋友在公司間唔中幫公司及老闆捱義氣，唔好怕蝕低。在能力範圍許何的情況下盡量走多一步，表現自己，不要跟公司或老闆斤斤計較。

但唔怕蝕低唔代表要做"Yes Man"！就算要蝕低都要睇下蝕低完的"經濟效益"如何才作決定。但問題係應該如何"Say No"呢？大口仔覺得打工仔要學懂"Say No"，第一件事要識分自己的職責範圍係乜？因為識分清楚自己的職責範圍才可衡量同事或老闆叫你做的是否你的職責範圍，"Say No"會否邊成別人眼中的"A字膊"。

如果你係一位有上進心的人，同事或老闆叫你做的都是你的"份內事"，無論係任何情況下都不宜"Say No"，因為你"Say No"就有大機會被人誤會你推卸責任，呢點要切記！

但對份外事又如何呢？

金融海嘯下如何保障生活

tabodiary — Sat, 20 Dec 2008 15:29:42 +0800

大口仔希望大家無借貸投資....

已多次重申自己對借貸投資的立場，即使你借入的錢全部買入大藍籌如匯控、中人壽或中移動都好，我的取態係完全不要借錢投資。

在現市況下，投資市場環境惡劣得不得了，若你早前借入私貸、信用卡或稅務貸款而買入股票，即使股票如何優質，當中的心理壓力不是大部分人可以想像的，若再加上不幸被公司裁員，持股又無息派，你說怎麼辦？

不借貸投資係金融海嘯下保障生活的第一誡條，其他準備工夫大口仔總結如下：

1. 為家庭保留最少能應付一年必要開支的現金
2. 必要開支 = 食飯錢、學費、供樓錢、管理費、水、電、煤等等費用，其他如月供股票、供保險、請工人、食餐好或每個月的個人消費不算必要開支
3. 重新審閱保單條款，留意有冇失業免供保障，必要時可唔可以停供一年但保留現金價值
4. 盡早減少一切不必要的開支，如旅行、買車、買名牌等行為，慳得一蚊得一蚊
5. 如手頭現金不足夠一年必要開支，請考慮減低投資組合以達至上述要求
6. 無論幾樂觀都好，要有被裁員的心理準備，若有依賴公司提供福利的打工仔(如按揭及醫療福利)，宜盡早準備一旦被裁員後的安排

唔怕一萬，至怕萬一，大口仔知道好多人都非常自信，投資眼光了得，所以不怕借錢投資、不怕做"月光族"，但如果你同大口仔一樣係凡人一個，有家庭兼仔細老婆嫩，準備工夫仲係做足點比較好。